熱愛投訴、遲到、冇禮貌…「港女8大賤事」揚威海外

[img]http://www.hothk.com/data/attachment/forum/201502/16/181009uyybb77f55zhffp5.jpg[/img]

話說本人工作每天都要招呼港女客人
講真唔係歧視佢地
但佢地真係10個入黎, 9個都係好冇禮貌
根據呢幾年做服務業經驗, 我覺得港女有8大賤格行為

1)冇禮貌

  入黎鋪頭黑口黑面, 作為一位稱職ge服務人員, 我當然微笑問佢:「小姐你好, 請問有咩幫到你?」
  港女一定例牌用37面對住你, 望都唔望你一眼, 當你透明, 俾個反應我都好似要佢施捨咁...
  

2)好中意問智障問題

(A)  舖頭discount做到1月31號, 佢地會問:「咁2月1號呢?」
(B)「小童係咪18歲以下?」 我相信有少少common sense都知唔係
(C)  舖頭要客人預約, 港女打電話黎, 通常問完一大餐之後話預約,當我問佢想book幾多點,
      電話另一邊就靜左2秒, 然後彈左句:「下午囉!」
     「OK...請問下午幾點?」
     「嚇? 要俾時間... 我點知我個Fd幾點放工走得呀!」
      永遠港女都係大條道理... 預約唔洗俾時間就根本唔係預約啦
      唔知自己個Fd幾時放工? 咁點解唔問左你個FD先再打黎預約呢?
  
3)好中意遲到

  舖頭一向9:30閂門, 港女可以9:47打電話黎D9我
  彷彿我準時閂門就好似犯左彌天大罪,佢地會話:「嚇!!!我遲左少少咋喎!!!我特登係屯門出黎架!!!」
  其實我又會唔會咁神通廣大, 連邊個黎緊我舖頭都知, 特登遲D閂門等你一個呀?

  我地客人都要預約左先上黎, 一般等客人30分鐘, 遲到個位就會俾第2個
  試過有客遲左足足1個鐘頭20分鐘, 乜通知都冇, 打電話俾佢亦都冇接聽
  好理所當然, 佢個位就俾左第2位客人啦
  點知佢上到黎, 知道自己個位冇左, 就即時發曬火, 係度大吵大鬧, 講佢ge「大道理」

4)無理要求

(A) 港女借廁所, 出到黎, 用果d好鬼乞人僧ge假笑聲同我地講:「你地呢求都幾搞笑, 廁所冇鏡ge?咁我照d乜野?」
     我只可以無奈扮返佢D假笑聲, 講句唔好意思
     大姐! 你當e度係時裝店定你屋企? 我地唔係賣衫又唔係賣鞋賣化妝品,廁所借俾客人只不過係俾佢地解決生理需要,
     咁都可以拎黎講!?

(B) 舖頭大大隻字光顧滿$200會送小禮物, 有d港女思想比較特別, 只係幫襯左$170, 好自然就冇小禮物啦
     港女就會聲大夾惡話我地冇俾禮物佢, 呃人
     經過店員解釋, 佢知道原因係自己未買夠錢, 佢地完全唔會覺得自己有問題或者唔好意思,反而變本加厲,
     用串我地ge語氣講:「咁搞笑???????姐係我買$180, 你都俾唔到我ge?$199.9你地都~~~係唔會俾小禮物我ge?都幾搞笑喎!!!!」

[img]http://www.hothk.com/data/attachment/forum/201502/16/181009n9mmrrfb0z149aer.jpg[/img]

5)乜都影一餐
  
  我都知港女乜都影一餐是常識, 佢地自己同自己影咪算囉, 點解要偷影工作人員, 又要拉人一齊影,同幫佢影
  睇清楚啊! 唔係影一兩張咁簡單! 每次佢地叫我幫佢影就至少冇左10-15分鐘!
  點解? 因為佢地要set好角度, 較好燈光, 補好妝, 擺好女神pose, 先至準你影!
  影完仲要俾佢過目, 為求呈現出最佳「女神」狀態, 通常佢地審核過, 都要影5張先至收貨
  我地唔係影樓, 工作人員做野都好忙, 幫港女影相, 分分鐘仲要俾佢串我唔識影

6)No Show VS No Booking

    舖頭仔, 做到ge客人數量有限, 所以我地都會要求客人預約左先, 一般等客人30分鐘
    港女最常出現以下2個情況:
(A) Book左No Show
     呢個我地日日都遇到, 既然打得黎book,點解黎唔到唔可以打埋黎cancel?
     港女心態就係自我中心, 黎唔黎都book左先, 反正自己冇蝕底,完全唔考慮店家同其他客人
     試過有人book左4點, 4點15分都未見人,我地就whatsapp問下佢係咪cancel, 佢就已讀不回
     到4點半我打電話去問, 佢喂左一聲,我一講到公司名佢就即刻CUT我線...
(B) No Booking
     港女有時打電話黎問野, 我地都會同佢講明一定要預約, 但係好得意,港女往往都係問完一大輪之後未必會book
     「唔預約會點?」
     「我俾唔到時間你!」
     查實並唔係話問完野一定迫你book, 查詢資料係完全冇問題,不過有好多港女又要上黎, 又唔book! 真係搵我黎搞!
      港女入到門口, 我例牌都問返句:「請問有冇booking?」
      港女一般有2個典型反應:
(A)  「嚇! 要book ge咩?」
       「姐係我冇book你就唔做我生意ge!」
       「咁搞笑?」
        當然, 如果咁岩得咁橋果個time slot仲有位,都可以放佢入黎
        不過大部份時間都係已經full左, 做唔到佢地生意,只可以講聲唔好意思, 再俾張卡片佢, 叫佢搵日打過黎book先再上黎
        港女當然又係發脾4啦
(B)   「我book左啦!」
         不過往往當我地翻查紀錄時,佢地都只係打過電話黎查詢又或者係whatsapp問下野, 根本冇book過
         港女又有機會大鬧天宮啦, 明明自己冇book,都可以反轉鬧返我地轉頭, 3個字, 大L曬

7)嫌3嫌4

   乜都嫌一餐係港女人格之一, 大至裝修, 地點, 小至地下一粒塵, 佢地都可以嫌一餐
   港女無論幫襯大小店舖, 俾多少錢, 都一律要求要受到6星級服務, 7星級環境, 8星級ge體驗
   咁又係... 環境爭DD女神又點樣係度自拍擺上網呃LIKE呀? 一定要D高檔野先襯得起佢地
   不過好可惜, 並唔係所有港女都俾得起錢去高檔野, 呢個都唔係問題
   問題在於, 俾唔起錢ge港女會選擇去平民店, 貪平丫嘛! 俾$50, 要求得到$5000服務,根本冇可能,
   到頭來, 一眾小店就受到窮港女歧視, 嫌3嫌4, 甚至受到要脅話會唱衰
   情形就如去旺角吉串魚旦, 都會被港女嫌污糟, 嫌冇用英國製銀器盛載, 嫌冇位坐, 等等...


8)熱愛投訴
   
   不理三七二十一, 港女一有咩問題, 或者有乜唔順眼, 就好中意用投訴黎「解決問題」
   試過有一次, 我地有1日東主有喜, 休息一天, 1個月前已經利用各渠道告知客人
   非常不幸, 有一個港女, 上到黎見門口通告, 就打電話黎鬧:
  「休息一天即係點? 咁你今日仲開唔開? 我搭車搭左成粒鐘架, 你唔開又唔通知我? 你地咁樣學咩人做生意呀,我上網唱衰你地呀!!」
    呢位港女大客, 根本冇打過黎查詢, 亦都冇預約, 試問我點通知你?
    學佢地講句, 「都幾搞笑喎!」