2014-11-26 11:34
Yoya_yoya
趙頌茹復出驚男人禁佬埋身
雖然逃離老公周永恒的魔掌，又得到廣告商及品牌話事人的雪中送炭，趙頌茹（阿Yu）復工短短兩個月就賺到一年家用，但好瘦的阿Yu接受《頭條日報》專訪時仍坦言陰影太深，未走出家暴陰霾。不過阿Yu好堅強，一邊努力忘記過去，一邊做善事，將資助10個雲南麗江學生的學費同膳食，「學生父親過咗身或傷殘，得番媽媽一個，點養得掂？」感同身受的阿Yu連聲歎氣。問到尋找第二春，阿Yu即刻落閘︰「唔諗，好大陰影，怕怕。」
[img]http://www.bastillepost.com/wp-content/uploads/2014/11/20141126_EN_%E8%B6%99%E9%A0%8C%E8%8C%B9-4.jpg[/img]
最近阿Yu為一個眼鏡品牌設計十款眼鏡，更親自演繹，所得收益全用來捐助建校助學團體「兩地一心」，除了出力，阿Yu更出心參加助學計劃，每年資助10個雲南麗江的高中生學費同膳食，每位資助費需要2000港元。坦言因為湊女未能北上探訪的阿Yu表示，會有義工探訪團跟進每個個案，「囡囡仲細，但我會畀片段佢睇，教佢珍惜，知足常樂。」
[img]http://www.bastillepost.com/wp-content/uploads/2014/11/20141126_EN_%E8%B6%99%E9%A0%8C%E8%8C%B9-5.jpg[/img]
問到揀選學生過程，阿Yu即一臉憂傷，「眼見佢哋嘅爸爸有啲過咗身或傷殘，得返媽媽一個人獨力湊兩個小朋友，呢啲個案好感同身受，所以優先獲得資助，希望幫得一個得一個，等媽媽冇咁大擔子。最緊要佢哋繼續有書讀，日後完成大學課程，可憑知識改善家庭環境，改變命運。」對於復出後速賺六位數，阿Yu強調賺嘅錢夠生活就可以，「回顧過去，我明白俾人幫助嘅重要性。出返嚟工作先開始儲蓄，我好肯定可以令兩個女食得飽，着得暖，而且活得快樂。」
提到家暴及第三者事件，阿Yu再一次澄清最低潮時「無諗過去死。」因為有兩個女要照顧，「試過喺街有師奶見到我激動到喊，原來家暴喺香港好常見。」問到囡囡有無搵爸爸？阿Yu答得決絕，「無，一啲都無。4歲大女信希好懂事，觀察力好強，佢好清晰知晒所有嘢，知道爸爸永遠係爸爸，但父母唔會再一齊住。」至於會否接受第二春，阿Yu答得激動「唔會再諗，以前怕接近男人（因為被性侵），依家搞成咁更加怕怕，真係留下好大陰影，仲未可以走得返出嚟。」