開店一個月賺到笑　譚小環魚蛋檔殺入MK

[youtube]fjYaIelTEdw[/youtube]

94年港姐冠軍譚小環當選後曾風光過，但近年演藝事業未見起色，她醒目離場，上月中更在銅鑼灣開舖賣魚蛋，吸引街坊食客撐場，小店日賣魚蛋約3,000粒，令小環火速省靚「魚蛋妹」生招牌。該店首月便回本兼有錢落袋，非常鼓舞，小環心思思把魚蛋檔殺入旺角。

藝人好多時表面風光，94年港姐冠軍譚小環當選後效力無綫18年，奉獻青春，大前年月薪18,000元獲加薪300元，辣㷫小環劈炮唔撈，幸好身邊有任職保險高層的老公蔡強榮力撐，小環轉行營商，上月中與友人合資百萬在銅鑼灣渣甸坊開舖賣魚蛋，小環放下港姐身份轉做「魚蛋妹」，店中大小事務都親力親為，開店僅一個月便回本，食客川流不息，她已計劃到旺角開分店。

[b]一腳踢袋幾萬蚊[/b]
小環開舖「渣哥一九九六」賣魚蛋，吸引街坊巿民光顧，前日中午2時許，記者走訪面積百多呎的小店，小環坐鎮打骰，招呼、收貨、下廚、收錢、包外賣和清潔等一腳踢，不過前來幫襯的食客除了幫襯一試「港姐魚蛋」外，還乘機集郵，連帶譚媽媽都不放過，小環的魚蛋檔彷彿變成老銅新景點。小環開心說：「我都意料唔到，多謝傳媒報道，大家都嚟試吓，周一到周四好多內地同台灣同胞遊客，佢哋有啲仲拎住雜誌嚟搵食，周五到周日就反而多啲香港人，可能大家放假就出動，我就不定時出嚟舖頭幫手。」

[img]http://static.apple.nextmedia.com/images/apple-photos/apple/20140416/large/16ec1p2.jpg[/img]
【食客集郵】■小環前日中午出舖頭幫手，即惹來食客車輪轉要求合照。

[img]http://static.apple.nextmedia.com/images/apple-photos/apple/20140416/large/16ec1p4new.jpg[/img]
【大排長龍】■小環在渣甸坊的魚蛋檔，經常人頭湧湧。

[img]http://static.apple.nextmedia.com/images/apple-photos/apple/20140416/large/16ec1p3.jpg[/img]
【母女同心】■小環和媽咪（左）夾手夾腳看舖，小環讚媽咪是鎮店之寶。

「渣哥」每日營業由朝早7時直踩翌日凌晨12時，每日17小時開舖爭取做盡早午晚餐、下午茶和消夜的生意。據知日賣魚蛋約3,000粒、燒賣2,000粒和腸粉3,000條，有指首個月生意額高達34萬，但開支都高，單是舖租便11萬，6名員工分兩更，倉租和水電雜項計埋都10多萬，小環說：「埋單落袋都係幾萬蚊，不過我預計舖仔要守，估唔到第一個月就回本兼有錢賺，意料之外。始終我哋賣得平，靠薄利多銷。」不過小環都擔心業主兩年租約後會加租，她賣口乖說：「我哋利潤好微，希望良心業主約滿後唔好加我哋。」

食客幫襯影合照
小環眼見「渣哥」生意興隆，已有大計乘勢開分店，更首選旺角，她說：「得閒會去睇吓啲舖，旺區租金都唔平，啱嘅店舖可遇不可求，真係要籌劃吓。」不過譚媽媽卻是保守派，她說：「要搞好呢間店先，一切慢慢嚟。」小環表示店中美食全靠媽咪做大廚，她說：「媽咪以前做過小販開檔賣睡衣，佢好了解客人需要，嚟得街檔都想幫襯平靚正，媽咪又係『味王』，整嘢不嬲好食，佢幫我炮製醬汁，係我哋『鎮店之寶』，佢日日嚟坐鎮，又會問吓人客意見，發現唔好即刻改進。」

[img]http://static.apple.nextmedia.com/images/apple-photos/apple/20140416/large/16ec1p6.jpg[/img]
【親力親為】■即使推車收貨，小環都應付自如。

[img]http://static.apple.nextmedia.com/images/apple-photos/apple/20140416/large/16ec1p5.jpg[/img]
【自度菜式】■人妻小環淥麵快手快腳，更自創撈麵開賣。

小環很重視每個客人，前日有她做生招牌，店前人頭湧湧，男女老幼要求合照，小環都笑臉迎人，大賣親切，她說：「食店好講服務同食物質素，我哋食物質素好嚴格，開店前試咗成個月唔同來貨，試到最好味先搶嚟賣，有啲食物為保持質素，售完即止。我又會每兩周創啲新菜式，等食客可以成日試到新嘢。」　　　
小環慶幸轉型合時，她說：「我有家室，唔可以去登台做夜場，日場有都可以搵我。」小環並不眷戀幕前生涯，譚媽媽是否支持女兒退出幕前？她說：「邊行都各有各好，做邊行都要盡力去做。」


來源:蘋果日報網站