遭德國槍絕殺三連敗 紐約人衰打倒褪

沒有最衰，只有更衰；講嘅係NBA球隊紐約人，周一喺主場出擊鬥小馬，已經用盡各種招數爭勝，既有安東尼瘋狂搶分，又有JR史密夫嘅蒙眼奸招，但都被「德國槍」奴域斯基絕殺，以108:110輸波，賽後正選控衞費頓更因為非法藏械被捕，真係衰嘢一籮籮。


[b]JR史密夫又出奸招[/b]
明星賽後紐約人贏過一場咁大把，周一主場對小馬都算有番啲鬥志，第2節一度落後14分，喺換邊後力追，其中安東尼嘅3分球仲好準，全場12射7中。紐約人想贏波，除咗靠實力，仲想靠旁門左道，最佳第6人JR史密夫，之前對小馬嗰陣曾經除對手嘅鞋帶，搞到被罰5萬美元；今次仇人再遇，JR又有新招，就係拉低小馬後衞卡達嘅頭帶，諗住可以遮住對方雙眼，卡達梗係好快發覺，亦都冇受影響。

儘管用盡唔同招數，但係紐約人都係輸波收場；第4節最後50秒，全場攻入44分嘅安東尼射入3分球，追成108平手，不過佢就守唔住奴域斯基嘅絕殺，俾呢位「德國槍」中距離跳投，籃球彈中框幾吓都碌入，整定紐約人唔好彩，結果兩分之差連輸第3場。小馬班主古賓出名口臭，賽後仲喺Twitter留言潤對手：「哈哈，較好嘅一方勝出，贏波後跑出球場，感覺真爽。」

[b]費頓賽後藏械被補[/b]
紐約人有「黑仔」安東尼，「奸仔」JR史密夫，原來仲有「衰仔」費頓，呢位控衞比賽完後返屋企途中，俾警方發現佢藏械，仲被控2級及3級藏械，喺美國係一項好嚴重嘅罪行，佢亦都被曼哈頓警方通宵拘留。不過費頓究竟點解比賽都帶槍，唔通想做低一向有仇口嘅教練活臣？紐約人頹成咁，周四作客總冠軍兩連霸嘅熱火，真係凶多吉少。


[img]http://static.apple.nextmedia.com/images/apple-photos/apple/20140226/large/aa0601a.gif[/img]

[img]http://static.apple.nextmedia.com/images/apple-photos/apple/20140226/large/aa0601b.gif[/img]


來源:蘋果日報網站