同祖記班主好熟 派路小三猛料

薑係老嘅辣，意甲不老傳說之一、34歲嘅祖雲達斯中場派路果然識食。意大利傳媒踢爆佢個小三喺都靈搞地產，而且同祖記嘅班主阿涅利家族關係密切，來頭真係唔嘢小。唔怪得佢肯放棄模範丈夫同好好先生嘅形象，甘願做個意甲賤男啦！
祖雲達斯禮拜二喺意盃8強戰，作客0:1輸畀羅馬出局；34歲嘅派路呢場都有踢，仲打正選㖭，但唔知係咪受偷食同離婚傳聞困擾，表現麻麻。早前有報道指，將會同祖記續約至2016年夏天嘅派路，同識於微時兼結咗12年婚嘅太太狄波拉搞緊離婚。由於佢踢咁耐波都未傳過任何緋聞，形象好到加零一，所以無啦啦話要離婚，令外界覺得好意外。話晒佢係意大利殿堂級球星，當地傳媒梗係唔肯放過佢，誓要搵佢個小三出嚟。我求大俠幾經打探之後，終於收到少少風，原來佢小三都幾猛料。

[img]http://static.apple.nextmedia.com/images/apple-photos/apple/20140123/large/aa04_01_a.jpg[/img]
■謝雲奴（圖）幫羅馬入意盃4強之餘，兼報番喺意甲吞祖記3蛋之仇。歐新社

[b]曾搭上會長個仔[/b]
聽消息人士講，派路個小三叫做芭甸妮（Valentina Baldini），同老婆狄波拉一樣都係金髮靚女，而且兩個都係34歲。就芭甸妮嘅背景，意大利啲狗仔隊暫時未刮到太多料，不過就知道佢喺都靈搞地產生意，仲鍾意去健身。更重要嘅係，芭甸妮同祖記老闆即係阿涅利家族有啲關係。
據了解，佢之前仲同過祖記會長法蘭素史堤芬斯個仔列卡度拍拖，由於法蘭素史堤芬斯同阿涅利家族嘅關係好好，而且好得到對方信任，所以芭甸妮同阿涅利家族都幾熟；早前更有報道話佢係阿涅利家族其中一個成員嘅姪女。話時話，派路個小三咁猛料，他日掛靴之後，睇嚟好有機會上位做祖記高層，分分鐘連會長都有得佢做。派路，我求大俠睇好你㗎！

[b]意盃被羅馬淘汰[/b]
講番禮拜二場意盃8強戰，羅馬憑阿仙奴棄將謝雲奴喺79分鐘射入致勝球，主場贏祖記1:0率先入4強，仲報番喺首循環意甲作客大敗0:3之仇。羅馬隊長托迪賽後話：「我哋不惜一切要贏呢場波。之前我哋喺都靈輸大大鑊，今日就證明咗自己同祖記一樣咁勁。」

[img]http://static.apple.nextmedia.com/images/apple-photos/apple/20140123/large/img0000012_aa04.gif[/img]


來源:蘋果日報網站