「錫面變錫嘴，短 Kiss變長 Kiss」 曹敏莉投訴謝天華拍劇抽水

電視台鹹豬手事件早前引起軒然大波，近日人氣急升的謝天華拍攝無綫新劇《老公萬歲》時，竟也涉及疑似鹹豬嘴。前晚他和李綺虹拍攝一幕水中激吻戲，同場現身的曹敏莉自言日前已跟天華拍過咀戲，又投訴他主動要求加料，由錫面變錫嘴，短咀變長 kiss，今次 Laughing哥都怕且笑唔出。

謝天華在無綫新劇《老公萬歲》中享盡齊人之福，與兩位港姐曹敏莉和李綺虹分別有接吻戲，沒想到前晚三人在深井為《老》劇拍外景時，曹敏莉竟公然踢爆天華疑似鹹豬嘴。

前晚劇情講述李綺虹被天華抱起拋落泳池，之後兩人在水中激吻，穿白色低V裙的李綺虹落水後濕身現形，天華則依劇本向她熊抱索吻，肉緊攬腰、箍頸兼啜到鼻扁，已於日前跟天華拍過咀戲的同劇演員曹敏莉在場冷眼旁觀，記者問她當日拍接吻戲的過程時，她忽然踢爆天華拍咀戲的加料經過，她邊笑邊說：「佢同導演要求有加冇減，原本錫面變錫嘴，短 kiss又變長kiss。佢係要咁改變，導演話 OK我都 OK，大家事前都有溝通，劇情係有咁嘅需要，合情合理。」
對於曹敏莉為咀戲詐型，天華聞言一臉不在乎，更寸她說：「佢中文差，睇錯中文字（指劇本）。其實最緊要佢接受，咁要劇情合理先可以接受。嘟嘟（鄭裕玲）同發仔（周潤發）當年咪咀得仲勁。最激唔係同曹敏莉，係同李綺虹呢場，佢咁都投訴，我同李綺虹原本水底激吻，但效果唔出，𠵱家改為水面。」他又笑言拍咀戲經驗不及李綺虹多，要她帶自己入戲。
語出驚人的曹敏莉，其實與天華關係微妙，前年天華拍攝內地節目《舞動奇跡》時，曾多口踢爆拍檔曹敏莉和黃長興舞出愛火花，所謂剃人頭者人亦剃其頭，曹敏莉今次提起Laughing哥，同樣有料唔怕爆。前日現場所見，穿泳衣的曹敏莉與天華交流不多，反而天華和李綺虹十分好傾，李綺虹還大讚天華說：「我之前同黎明、陳小春同陳錦鴻拍過咀戲，不過天華都好正，佢好有經驗，好識放電，真係俾佢電親。」

昨日《老》劇在將軍澳電視廣播城舉行拜神儀式，曹敏莉以有事為由缺席，其間天華被問到遭曹敏莉踢爆要求多多時，他認真地說：「我都係為部劇先有要求，嗰場戲係要我哋錫得好激，但睇番 playback嘅效果唔係太滿意，又有啲穿崩位，所以要求再拍過，我哋事前係有溝通。」
李綺虹也力撐天華說：「我唔覺得天華佢有好多要求，反而係我成日要求多多，驚住會嚇親天華喎！可能曹敏莉細路女啫。」監製唐基明也說：「天華有要求係好事，佢都係為部劇，有時我仲覺得要求唔夠多㖭。」至於天華太太 Tina昨日則在電話中說：「我一向好尊重天華嘅工作，我完全冇意見。」

[attach]504123[/attach]

投訴謝天華抽水的曹敏莉，現年 26歲，是 03年港姐四料冠軍，出道以來緋聞不算多，最轟動要數 05年拍攝劇集《胭脂水粉》時，被指與年長她 39歲的陳鴻烈發展忘年戀，惟當事人矢口否認。
07年初曹敏莉被本報拍得與貌似陳錦鴻的圈外男友拍拖，不足一年便分手。同年底她與黃長興到內地演出《舞動奇跡》一撻即着，更遭黃長興舊愛梁寶賢（Bibi）破口大罵，曹敏莉雖從未親口承認與黃長興拍拖，二人卻不時情侶檔出席活動晒恩愛，惜於去年底分手。之後曹敏莉火速覓得新歡，男友是前「熊谷組香港」公司創辦人于鏡波的二公子 David，亦即周星馳女友于文鳳的二哥。

http://hk.apple.nextmedia.com/template/apple/art_main.php?iss_id=20090520&sec_id=462&subsec_id=830&art_id=12777895